Дэлгэрэнгүй
Татаж авах Docx
Дэлгэрэнгүй уншаарай
Дээрхийн Гэгээнтэн 17-р Гармава, Оген Тринлей Дорж бол Төвөдийн Буддизмийн 900 жилийн түүхтэй Кагью (Гаржүд) ёсны тэргүүн юм. Дээрхийн Гэгээнтэн уламжлалт Төвөдийн дуурийг орчин үеийн театртэй хослуулан хэд хэдэн жүжиг бичин найруулсан. Түүний бичсэн анхны жүжиг Төвөдийн агуу иогч Мял Богдын амьдралын тухай байсан ба Энэтхэгийн Бодгаяа хотод 2010 онд анхны тоглолтын нээлтээрээ 20,000 гаруй үзэгчдийг татсан. Хэдийгээр Төвөд дэхь нэгэн нүүдэлчин айлд махан хоол идэж өссөн ч гэлээ, Дээрхийн Гэгээнтэн хожим нь мах идэхээ больж, бусад хүмүүсийг мах худалдан авах, зарах, мөн идэхээ зогсоохыг тууштай уриалсаар байсан. 17-р Гармава гуай нигүүлсэл, хайр энэрэл, эмэгтэйчүүдийн эрх, цагаан хоол, Дэлхий Ээжийгээ хайрлан хамгаалах нь хамаг олны үнэт зүйл гэдэгт бат итгэдэг. 2007 оны 1-р сарын 3-нд Энэтхэгийн Бодгаяа хотод зохион байгуулагдсан 24 дэх жилийн Агуу Гаржүдийн Монлам ёслолын үеэр цагаан хоолны тухай айлдсан нэгэн яриандаа Дээрхийн Гэгээнтэн бүх дагалдагчдадаа цагаан хоолтон болж чандлан мөрдөхийг захисан: “Камцанг Кагью (Гаржүд)-д харьяалагддаг бүх хийд, хийдийн гал тогоо махтай хоол хийж болохгүй, тэгэх ёсгүй. Хэрэв хийдийн гал тогоонд мах авчирч, хоол хийвэл, энэ нь та нар намайг багшаа гэж үзэхгүй байна гэсэн үг, та нар Гарма Гаржүдэд харьяалагдахгүй гэсэн үг. Үүний тухай хэлэлцээд байх зүйл огт байхгүй. Гүйцээ. Энэ бол маш чухал.” Бид одоо та бүхэндээ Дээрхийн Гэгээнтний айлдсан цагаан хоолны тухай болон цэвэр цагаан хоолтон байсан өмнөх Гармава нарын тухай сургаалаас хүргэх болно. “Хэдэн жилийн өмнө нэгэн Гаржүд Монлам ёслол дээр би цагаан хоол идэх, мах идэхээ болих тухай сэдвээр ярьсан. Та бүхэн үүнийг зарлал гэж хэлж болно, гэвч энэ нь үнэхээр санал тавихтай адил байв. Түүнээс хойш, олон жил өнгөрчээ, эдгээр жилүүдэд хүмүүс олон янзын зүйлс ярихыг би сонссон. Зарим хүмүүс бүр ‘Өө, Оген Тринлей Дорж хэрэв та нар мах идэхээ болихгүй бол, та нар Гаржүдийн лам биш гэж хэлсэн’ гэж байв. Үнэндээ ингэж хэлсэн хүн нь би биш юм. Үүнийг хэлсэн хүн бол 8-р Гармава Микё Дорж хэлсэн. Тиймээс, энэ нь миний санаа биш бөгөөд би та нар мах идэхээ больсон нь дээр, эс бөгөөс та нар Гаржүдийн лам биш хэлсэн бус юм.” “Үүнтэй адил, хэрэв та нар Винайн аймаг савын тухай айлдсан 8-р Гармавагийн тайлбар болох Дэлхийг Тодоос Тод Гэрэлтүүлэгч Нарны Тойрог Зам номыг уншвал, үүнд жилийн төгсгөлд Гутор болон Махакала ёслолыг үйлдэх үед, өргөлд мах багтах ёсгүй байдаг. Тэр Агуу Хурал Номын Газарт мах идэхийг хориглоод зогсохгүй, бас Төвөд даяар Төвөд хүмүүст цагаан хоол идэхийг уриалж байсан. 8-р Гармавагийн Эмхтгэл Бүтээлүүдийн жагсаалтад, Төвөд хүмүүст өгсөн нэгэн зөвлөгөө бас байдаг ба, яагаад биеэ хамгаалах чадваргүй амьтдын махыг идэх нь зүйд нийцэхгүй тухай өгүүлдэг. Тиймээс бид 8-р Гармава зөвхөн Агуу Хурал Номын Газарт мах идэхийг хориглоод зогсохгүй мөн Төвөд даяар цагаан хоолыг дэмжиж байсныг харж байна.
